痛苦的轉機

講返搭新航去袋鼠國既經歷，首先我為左貪平，我今次係揀左轉機既...你地都知啦，我咁大個人都係第一次遠行，我真係諗都冇諗過轉機去旅行係咁 hardcore 既一回事。

總之，三個字......冇! 下! 次!

嘩，見到 ZUJI 訂新航 HKD 5600 往返香江 / 袋鼠國，仲平過魚翅既 fanfare，仲可以比我白馬王子 A380 載我遠行。諗左兩秒，買!!!!!!!!!!!!!!!!!

-----------------------------------

短途機 香江 to 星洲
機程 4 小時

我係坐 Economy 3-4-3 既 3，即飛機右排。當時我係坐晌中間，右手邊男士係香江人，左手邊位女士係星洲人。成日都聽到好友 Magmag （同為魚翅空姐一名，BFF，將來文章出現率應該會奇高）訴苦話星洲人難服侍。今日只係坐隔離都領教到....

星洲女任何時間同新航既 staffs 交收時（例如收 nuts / 收熱毛巾 / 派餐 / 還毛巾 / 收餐）佢都是唔會直接遞比個 staffs，而是遞比我的，呢樣其實我覺得只係舉手之勞亦好樂意去幫忙，可能 A380 既 window seat 真係隔條 aisle 好遠遠遠遠遠呢...

派餐時，我遞個餐比佢而佢又接實個餐之後開始望死我（眼尾見到，因為我當時已經同我份飛機餐 interact 緊）一路食一路感覺到個眼神冇放過我，（唔對路）我再望一望佢，原來佢張食飯檯仲未開等緊我幫佢開!!! 整乜鬼你唔一早開定!?! 幫佢開完檯，佢都冇開金口講「唔該」....（我好肯定佢口齒伶俐，因為前排三個位都係佢既屋企人，佢係有開口同佢地講野既）

神來之筆係當大家都食完個飛機餐時，佢突然伸隻手埋唻將我個餐盆轉 90 度，由打橫轉成打直，然後! 再將佢份飛機餐餐盆放埋落我張檯度!!!!!!之後佢就施施然收好張檯然後準備入眠。

我望住面前兩個餐盆呆左，我諗：也許您要睡一睡，也許你望見空服員正開始收餐，也許你知道呢兩個餐盆根本不會阻礙到我看電影。

星尊貴，你知道嗎？方仗(我)份人真係好小器，其實 all I want is your 「唔該」...

不過我對星洲既完美印象係絕對唔會比星尊貴係影響到架!! 新航師姐真係又靚又溫柔體貼又笑得甜...（下冊一千字....）

-
-----------------------------------
時間去到我回程既航機
長途機 袋鼠國 to 星洲
機程 8 小時

由袋鼠國回星洲途中，然後再轉機返香港。到左星洲係 12:30AM..之後要晌機場訓過夜，等到 7:30AM 先可以再上機............唉!! YOLO!! 未訓過機場又點算一個出色既浪子~!? 是咪先是咪先是咪先？

搭長途機塊面同個頭都油淋淋、個口又臭排牙又鞋、條腰又痛、眼又乾鼻腔又乾喉嚨又乾咀唇又乾。

但眼見靚女新航空姐著住件又窄又唔透氣（好似係）既制服、化全妝、然後好 elegant 地"不"雪糕比我食，當我食完之後仲笑得好甜地問我飲唔飲茶（係呀!!!!佢對住我笑呀~~~~~!!!無限心心心心心心）

究竟每個飛天人係點克服無限 long haul 輪迴？（好彩魚翅派雪糕時係成杯派）

新航長途機大發現：

1）會派兩次熱毛巾，當我第一次收到之後就立即撻上塊面熱 fu，但隨即發現隔離位靚仔洋人用唻抹檯....然後我硬係覺得塊面痕痕地....

2）會比對好似襪仔比你，其實我都唔知用唻做乜，我見到隔離個洋人除左對鞋，然後再笠住佢自己本身對襪。嘩!! 即刻跟埋佢除鞋，學佢咁著，我諗對野點都唔會用唻笠手掛?!